FLOODS

မြစ်ချောင်းများရေလျှံ၍ရေကြီး/ရေလွှမ်းခြင်း 

Fluvial floods (river floods)

မိုးရာသီကာလအတွင်း မြစ်ချောင်းများရေပြည့်လျှံပြီး ရေကြီးခြင်း/ရေလွှမ်းခြင်းများဖြစ်ပေါ်စေသည်။ မြစ်‌ချောင်းများရေပြည့်ရေလျှံခြင်းမှ ဖြစ်ပေါ်သည့် ရေလွှမ်းမိုးမှုသည် မိုးရွာသွန်းမှု ပုံမှန်ဖြစ်မြဲထက်ပိုမိုခြင်း(မိုးအလွန်များခြင်း)နှင့် နှင်း/ရေခဲများအရည်ပျော်ပြီး မြစ်ရေမြင့်တက်လာခြင်းတို့ကြောင့် ဖြစ်လာရသည်။

မြစ်ချောင်းများမှ ရေလွှမ်းမိုးခြင်းသည် မြစ်ကမ်းပါးများကိုကျော်လွန်ပြီး မြစ်အောက်ခြေဒေသများအထိ ဧရိယာကျယ်ပြန့်စွာရောက်ရှိနိုင်ကာ ဆည်/ရေလှောင်တမံများ၊ ရေဝပ်ဧရိယာများသို့ ရေဝင်ပြီး တမံကျိုးပေါက်ခြင်းနှင့် နွံအိုင်များပိုမိုကျယ်ပြန့်လာခြင်းတို့ကို ဖြစ်ပေါ်စေသည်။

မိုးလေဝသကြိုတင်ခန့်မှန်းချက်သတင်းများကို ဂရုစိုက်ရယူကြပြီး အန္တရာယ်ဖြစ်နိုင်သည့်မြေပြင်အခြေအနေများ ပြုပြင်ခြင်း၊ မြစ်ကမ်းပါးများကိုရနိုင်သလောက်မြှင့်တင်ထိန်းသိမ်းခြင်းနှင့် လျှံတက်လာသော မြစ်ချောင်းရေများ စုစည်းအိုင်ထွန်းသွားနိုင်မည့်ဧရိယာ(သို့မဟုတ်)ရေဝပ်နိုင်မည့်အနိမ့်ပိုင်းဧရိယာများ တွင်နေထိုင်သူများကို အသိပေးခြင်း၊ ကယ်ဆယ်ရွှေ့ပြောင်းခြင်းများအချိန်မီလုပ်ကြရသည်။

Surface Water Floods(မိုးများ၍ရေကြီးခြင်း)

မြို့ရွာ၊ လူနေရပ်ကွက်များရှိ ရေစွန့်ထုတ်သည့်စနစ်များ(urban drainage systems)မကောင်းခြင်း၊ ပိတ်ဆို့ခြင်းကြောင့် "ရေစီးရေလာမကောင်း/နည်းပါးပြီး လူနေရပ်ကွက်လမ်းများနှင့် အနိမ့်ပိုင်းဧရိယာများ၌ ရေကြီးခြင်းများဖြစ်ပေါ်စေသည်။ ရေလွှမ်းခြင်းမဖြစ်မီ ရေတက်လာသည့်နှုန်းက တအိအိနှင့်ဖြည်းဖြည်းချင်းတက်လာပြီး အနိမ့်ပိုင်းအိမ်ခြံ၊ လမ်းများရေမျက်နှာပြင်မြင့်တက်ဖုံးလွှမ်းသွားသည့်အတွက် ကယ်ဆယ်ရွှေ့ပြောင်းရေးများဆောင်ရွက်ရန် အချိန်လုံလောက်စွာရနိုင်ကာ ရေလွှမ်းနေသည့်ရေပြင်တွင်သွားလာရင်း အနိမ့်ပိုင်းသို့အမှတ်မထင်ရောက်ရှိပြီးရေနစ်သေဆုံးခြင်းများ ဖြစ်ပေါ်တတ်သော်လည်း ရေမလွှမ်းမီမြေပြင်အနေအထားကို သိရှိပြီး၊ သတိထားသွာလာကြလျှင်အသက်အန္တရာယ်ဖြစ်နိုင်ချေနည်းပါးသည်။

Flash Floods(တောင်ကျချောင်းရေများကြောင့်ရေကြီးခြင်း)

လူနေရပ်ကွက်များ၊ ကျေးရွာများအနီးမှ မြေမျက်နှာပြင်မြင့်သည့်တောင်ကုန်း/တောင်တန်းများနှင့်ဆက်စပ်နေသည့် ချောင်းဖျားဒေသတွင် မိုးသည်းထန်စွာရွာသွန်းပြီးသည့်နောက်၊ အချိန်တိုအတွင်းအရှိန်အဟုန်ပြင်းစွာဖြင့် မြေနိမ့်ပိုင်းများရှိရာသို့ စီးဆင်းလာပြီး ရေမျက်နှာပြင်မြင့်တက်ရေလွှမ်းမိုးခြင်းကိုဖြစ်စေသည့် ရေကြီးခြင်းအမျိုးအစားဖြစ်သည်။ တောင်ကျချောင်းရေများကြောင့်ရေကြီးသည့်အခါ ရေစီးဆင်းသည့်အရှိန်အဟုန်မြန်ဆန်သောကြောင့် ရေစီးဆင်းရာလမ်းတလျှောက်မှ သစ်ပင်များ၊ လမ်းများ၊ တံတားများကို တိုက်စားဖျက်ဆီးသွားသည့်အပြင် လူနေရပ်ကွက်များအထိရေဝင်ရောက်လာပါက ရေတက်နှုန်းမြန်ဆန်သောကြောင့် လူနေအိုးအိမ်များ၊ မွေးမြူရေခြံများ ချက်ချင်းရေမြုပ်ကာ ကယ်ဆယ်ရွှေ့ပြောင်းရေးလုပ်ငန်းများလုပ်ဆောင်ရန် အချိန်မမီတော့ပဲ ဖြစ်ရသည်က များသည်။ အသက်အိုးအိမ်ပျက်စီးဆုံးရှုံးနိုင်ချေလည်းပိုမိုများပြားသည်။

ကမ်းရိုးတန်းဒေသများတွင် ပင်လယ်ဒီရေမြင့်တက်ခြင်း၊ မုန်တိုင်းဒီလှိုင်းရိုက်ခတ်ခြင်းကြောင့် ရေကြီးခြင်း/ရေလွှမ်းမိုးခြင်း Coastal flood (storm surge)

မုန်တိုင်းများတိုက်ရိုက်ဝင်ရောက်တိုက်ခတ်ခြင်းကြောင့် ဖြစ်ပေါ်လာသည့် မုန်တိုင်းဒီလှိုင်းရိုက်ခတ်ခြင်းနှင့် မုန်တိုင်းဒီရေလွှမ်းမိုးခြင်းသည် ကမ်းရိုးတန်းဒေသများတွင် အန္တရာယ်အများဆုံးဖြစ်သည်။ ယနေ့ခေတ်တွင် မုန်တိုင်းသတင်းများကို အချိန်မီကြိုတင်ခန့်မှန်းပြီးမုန်တိုင်းတိုက်ရိုက်ဝင်ရောက်တိုက်ခတ်နိုင်မည့် မုန်တိုင်းလမ်းကြောင်းကို ကြိုတင်ခန့်မှန်းအသိပေးနိုင်သောကြောင့် မုန်တိုင်းတိုက်ရိုက်ဝင်ရောက်တိုက်ခတ်ခြင်းခံရမည့်ဒေသတွင်းမှ လူ/တိရိစ္ဆာန်တို့ကို အချိန်မီ ကယ်ဆယ်ရွှေ့ပြောင်းပေးနိုင်သည်။